एउटा औसत नेपाली हुनु पनि कति तनावको कुरा हो हेर्नुस् न!
चुनाव मुखैमा आइसको । क-कसको पो गठबन्धन बन्ने हो थाहा छैन । गाली गर्नुपर्ने र समर्थन गर्नुपर्ने अझै कित्ता-काट गरिसकेका छैनन् नेताहरुले । मुख चिलाएर बसिनसक्नु छ यता ।
उता पल समिक्षाको काण्ड सेलाउन पाएकै छैन कताबाट प्रकाश सपुत झुल्किहाले । त्यसमा नि धित मर्ने गरी बोल्न सकिएको छैन । पललाई कतै जेलमै सडाउने पो हुन की? सम्झिँदा पनि निद्रा लाग्दैन ।
भारतसँग लफडा नभएको पनि जुग बितिसको । बिस्तारबाद मुर्दाबादको नारा लाउने कैले हो अब! धन्न बिचमा एम.सि.सि. कताबाट आएछ त अलिलि मुखको चिलाई मर्यो (कसै कसैको त ढाडको चिलाई पनि राम्रै मर्यो होला)। तर अझै आँत भर्ने गरि त पुगेकै छैन ।
उता रुसले युक्रेनलाई हान्या हान्यै छ । यता आफ्नै घरको संकटले बिचमा आफैलाई हानेको भएर रुस-युक्रेन संकटमा ध्यान दिन पाको छैन । ऐल्यै त एटम हानिनहाल्ला । तेल सम्म रोकिदिन्छ त्यो चैँ मैले पैलै अड्कल लाको हो । फेसबुकमै ठोकुवा गरेको थिएँ ।
अझ दुःख हेर्नुस् न! रवि लामिछानेलाई प्रधानमन्त्री बनाउने कुरा यतिकै सेलायो । धुर्मुसलाई अर्थमन्त्री दिने, कुलमानलाई उर्जा, महावीर पुनलाई विज्ञान, रमेस खरेललाई गृह लगायतका मन्त्रालयहरु छुट्ट्यार त्यती राम्रो मन्त्रीमण्डल प्रस्ताव गर्दा पनि कसैको घैँटोमा घाम लाग्या हैन । राम्रा मान्छेलाई काम गर्न त काँ दिन्छन् र नेपालमा?
सरकार युट्युबलाई नियन्त्रण गर्न खोज्दैछ रे भन्ने सुन्दैछु । अब पुण्य गौतमका महान विचारहरु कता पो सुन्नु? धन्न भिम उपाध्धे फेसबुकमा छन् र बेला बेला दिव्य ज्ञान लिन मिलिरहेको छ ।
महानायक महानायिकाको विवादमा पुरै बोल्नै नपाइ विवाद नै सेलायो । कस्सो कस्सो एउटा पोस्ट फेसबुकमा पोस्टयाउन पाएँ । नत्र त्यो नि खेरै जाने ।
तनाव कति छ भने हेर्नुस्, भनेर साध्धे नै छैन ।
आजकल कामको चाप अलिक बढेर होला फेसबुक खोल्न भ्याइँदैन । जाबो ८-१० घण्टा हेर्यो चित्त बुझायो । अनि युट्युब कतिबेला हेर्नु? टिकटक कतिबेला हेर्नु? एकैछिन ढिला भो कि को अग्गी को कतिबेला भाइरल भइओरी गायब भइसकेको हुन्छ ।
अफिसको तनाव आफ्नै ठाउँमा छ, घरमा भुटुन सिध्धेको हिँजै हो, गोजिमा सुको खोज्दा ल्वांग सुकमेल बाहेक अर्थोक आउँदैन ।
अनि यति स्यानो मगजमा यति धेरै तनाव कसरी थामेर बस्या छु, अचम्म लाग्दैन तपाइँहरूलाई?
No comments:
Post a Comment